مجال البرمجة وأنواعها

س : من وين أبدأ أتعلم البرمجة؟؟

سؤال محير الكثير من الناس الدايرة تخش المجال دا، للأسف جامعتنا ما بركزوا على النقطة دي، طوالي يبدوا خاشين في لغات البرمجة.

طيب البرمجة بإختصار شديد، ممكن نقول نسوي برامج أو أنظمة أو تطبيقات نخلي الأجهزة زي الحاسوب والجوالات وغيرها تعمل لينا مهمة محددة حسب الحاجة البرمجتها ليها.

 طيب البرمجة أنواع، طبعاً البرمجة أنواعها لا حصر لها لكن في هذا المقال بنوريكم اشهر الأنواع والفرق بيناتهم شنو، عندك برمجة الألعاب وعندك برمجة الأنظمة البتتعامل مع قواعد البيانات وعندك برمجة برامج بتعمل ليك حاجات محددة زي مثلاً Anti-Virus وبرامج تنظيف الريجستري وبرامج تشغيل الصوت وغيرها ودي ياها المستخدمة في معظم الكمبيوتر والموبايلات عن طريق تطبيقات توفرها شركات متخصصة في المجال دا.

س: هل أنا أتخصص فيهم كلهم؟؟ وياتا عندها سوق عمل؟؟ البتجيب لي القروش والبقدر أستفيد منها ياتا؟؟

البرمجة أهم فيها حاجة أنت رغبتك وشغفك شنو فيها، يعني إذا أنت عندك الرغبة في برمجة الألعاب، كون فريقك وتعرف على أشخاص مثلك في المجال دا وأقعدوا مع بعض وأعملوا ليكم ألعاب جميلة وما تسمع كلام الناس بأنو الألعاب ما عندها سوق، أو ما حتقدر تعمل ألعاب زي ناس الغرب، دا كلو كلام فاضي، أنت قادر تعمل ليك سوق بإبداعاتك والناس أصلاً ضدك في كل الأحوال.

طيب بالنسبة للبرمجة البتتعامل مع قواعد البيانات دي عندها أنواع برضو زي برمجة مواقع الويب وعندك برمجة سطح المكتب وغيرها وعندك برمجة أنظمة تدير ليك قواعد البيانات نفسها، برمجة زي دي بقت مشهورة ولكن لإتقانها لازم يكون  عندك أمكانيات في تحليل والتصميم البرنامج المقصود بالتحليل هي يكون عندك نظرة أنو البرنامج دا كان أتنفذ على أرض الواقع حيكلف كم؟؟ وهل حيحل مشكلة هذه المؤسسة؟؟ وهل بجيب أرباح للمؤسسة ولا لا، لأنو في حالات الأنسب للجهة هو النظام اليدوي خاصة في المؤسسات الصغيرة.

س : ايهما أفضل برمجة الويب ولا برمجة أنظمة سطح المكتب؟؟

ما في برمجة أفضل من برمجة أخرى، نديكم مثال ليها زي شركات الطيران مثلاً الموظفين بتعاملوا ببرامج كبيرة زي الـ amadeus والـ Galileo وكده، طبعاً أي موظف بيأخذ دبلوم أو كورس بالكلام دا وطبعاً هو برنامج بروفشنال ما أي زول بيقدر يشتغل عليهو، وفي نفس الوقت الشركات داير الزبون ينهي الإجراءات عن طريق النت، فالحل الغير علمي أنو نخلي أي مستخدم ينزل الأماديوس دا ويقرأ كم كورس ويجي يحجز، دا حل غير عملي ومكلف لأنو الأماديوس لا يسلم إلا لشركة ولا وكالة سفر فقط، فقاموا جابو فكرة الموقع البتقدر تحجز منو، وفي نفس الوقت ما معقد تكون واجهتوا بسيطة وجميلة، أنت بتنفذ الحجز والموقع براهو بيكتب ليك الأوامر في الأماديوس وأصلاً بكونوا عاملين صلاحية للمواقع أنو ينفذ حاجات محددة في برنامج الأماديوس.

فـ لو قلنا الويب ما مهم ما كان في إجراءات بتم عن طريق النت، وبرضو لو قلنا برامج سطح المكتب ما مهمة، كان الأماديوس وغيروا أنتهوا من زمان.

نجي لأخر نوع وهي برمجة البرامج العادية العندها مهمة محددة، زي برامج الأوفيس والمتصفحات ومشغلات الموسيقى وبرنامج تعديل الصور ومحررات الفيديو وغيرها، دا برضو مجال براهو ممكن تتخص فيها عندها أهميتها وبتخدم الناس كثير في أمور حياتها اليومية.

وفي برمجة الرقاقات المستخدمة في الإلكترونية يتم دراستها الناس المتخصصة في هندسة إلكترونيات وهندسة الحاسوب، وفي برمجة برامج الشبكات، البتتحكم لينا في الشبكات وحمايتها من الثغرات، وفي برمجة تطبيقات الهواتف الذكية التي تقوم مهمة محددة وغيرها

في النهاية كلها أنواع البرمجة وعند كل نوع مهمة محددة تفيد المستخدم النهائي لهذا البرنامج او الأنظمة، وكل نوع عندوا لغات البرمجة المخصصة له، الأفضل أنك تتخصص في واحدة وتتمكن فيها وتكون عندك خلفية شاملة لأدواتها ومكتباتها وملحقاتها.

بالتوفيق للجميع